Baıqaýda «Kórikti ǵımarat aýlasy», «Úzdik jasyl aýla», «Taza kireberis», «Úzdik PIK», «Úzdik MIB» syndy atalymdar boıynsha úzdikter anyqtaldy. Bas júlde Gagarın kóshesindegi 72/2 úı turǵyny Sharıpa Rymbaevaǵa tabystaldy. Jeńimpazdarǵa marapattardy oblystyq máslıhat depýtattary, partııa fılıaldarynyń basshylary men qoǵamdyq uıym ókilderi tapsyrdy.
Atalǵan baıqaý respýblıkalyq «Taza Qazaqstan» aksııasy aıasynda uıymdastyryldy. Sol kúni Ulytaý oblysynyń barlyq qalalary men aýdandarynda jappaı senbilikter ótti. Jezqazǵanda jastar men eriktilerdiń qatysýymen ortalyq kósheler tazalanyp, Sátbaev qalasynda ekologııalyq mádenıetti nasıhattaýǵa arnalǵan shara uıymdastyryldy. Qarajal qalasy men Jáırem kentinde saıabaqtar men demalys oryndary tazartylyp, Jańaarqa aýdanynyń ortalyq alańynda senbilik ótti. Ulytaý aýdanynda aýyl turǵyndary men jastardyń qatysýymen Embulaq óńirinde tazalyq sharasy ótti.
Ulytaý oblysynda jyl basynan beri jeti oblystyq jáne segiz qalalyq senbilik uıymdastyryldy. Sondaı-aq apta saıyn «Taza beısenbi» aksııasy turaqty túrde ótedi. Jalpy «Taza Qazaqstan» bastamasyna 44 myńnan astam adam qatysyp, 870 arnaıy tehnıka jumyldyryldy, nátıjesinde 3520 tonna qoqys shyǵaryldy.
